ᓱᓕᓂᕆᔭᕗᑦ:
ᕿᑭᖅᑕᓂ ᓴᓇᔪᓕᕆᓂᕐᒧᒃᑯᓐᓂᒃ ᐅᑉᐱᕈᓱᑦᑐᒍᑦ ᐱᓕᕆᑦᓯᐊᖅᑐᑦ, ᖃᓂᒪᖏᑦᑐᑦ ᐊᒻᒪᓗ ᐊᑦᑕᕐᓇᑦᑐᒦᖏᑦᑐᑦ ᐃᖅᑲᓇᐃᔭᖅᑏᑦ ᓴᙱᓂᕐᔪᐊᕐᓂᒻᒥᙶᖅᑐᑦ ᓄᓇᓕᒻᒥ, ᐃᓕᖅᑯᓯᕐᒥᓂ ᐊᒻᒪᓗ ᓄᓇᒥ. ᓱᓕᓂᕋᐃᕗᒍᑦ ᓄᓇᓕᓐᓂ ᑲᑐᔾᔨᖃᑎᒋᔭᑦᑎᓐᓂᒃ, ᐃᖅᑲᓇᐃᔭᖅᑎᓂᒃ ᐊᒻᒪᓗ ᑎᒍᒥᐊᖅᑎᐅᔪᓂᒃ ᐱᕕᖃᖅᑎᑦᓯᓂᕐᒧᑦ ᑮᓇᐅᔾᔭᕈᓐᓇᕐᓂᕐᒥᑦ ᐃᓄᐃᑦ ᒪᑭᒪᑦᓯᐊᕈᓐᓇᕐᓗᑎᒃ.
ᐊᖏᖅᓯᒪᓂᕗᑦ ᓄᓇᓕᑦᑎᓐᓄᑦ
ᕿᑭᖅᑕᓂ ᓴᓇᔪᓕᕆᓂᕐᒧᒃᑯᓐᓂᒃ ᑐᙵᕕᓪᓗᐊᑕᕆᔭᕗᑦ ᑐᕌᕐᓂᖃᖅᑐᖅ ᐸᕐᓇᐃᓂᒃᑯᑦ ᑲᑐᔾᔨᖃᑎᖃᕐᓂᕐᒥᑦ ᐊᑐᐃᓐᓇᐅᑎᑦᓯᔪᒥᒃ ᑮᓇᐅᔾᔭᕈᑎᑦᓴᑦᓯᐊᕙᒻᒥᒃ ᐊᒻᒪᓗ ᐱᐅᓯᕚᓪᓕᕈᑎᑦᓴᓂᒃ ᐃᓄᐃᑦ ᓄᓇᓕᖏᓐᓄᑦ, ᐃᓚᒌᓄᑦ ᐊᒻᒪᓗ ᐃᓄᑐᐃᓐᓇᕐᓄᑦ. ᑐᕌᒐᕆᓪᓗᐊᑕᖅᑕᕗᑦ ᑲᑐᔾᔨᖃᑎᒌᖑᓪᓗᑕ ᐃᓄᓐᓂᒃ ᐱᖃᑕᐅᑎᑦᓯᑦᑎᐊᓇᓱᓪᓗᑕ ᐱᔨᑦᓯᕋᑦᑕᕗᑦ ᐊᐅᓚᑦᓯᔾᔪᓯᖏᓐᓂᒃ. ᐊᑐᖃᓯᐅᑎᓲᖑᔪᑦ ᐃᓄᓐᓂᒃ ᐃᖅᑲᓇᐃᔭᖅᑎᑦᓯᓂᕐᒥᑦ ᐊᒻᒪᓗ ᑲᔪᓯᓂᖃᑦᓯᐊᖅᑐᒥᑦ ᓄᓇᓕᓐᓂ ᐊᐅᓚᑦᓯᓂᕐᒥᑦ ᓇᒻᒥᓂᕆᔭᑦᑕ ᐸᕐᓇᐅᑎᖓᓄᑦ, ᖃᓄᕐᓗ ᐸᕐᓇᐃᓲᖑᒻᒪᖔᑦᑕ ᐊᒻᒪᓗ ᐊᐅᓚᑦᓯᓲᖑᒻᒪᖔᑕ ᐱᓕᕆᐊᕆᔭᑦᑎᓐᓂᒃ. ᓇᒻᒥᓂᖃᕐᓂᕐᒧᑦ ᐸᕐᓇᐅᑎᕗᑦ ᐊᒻᒪᓗ ᐅᓂᒃᑳᓕᐅᕐᓂᕐᒧᑦ ᐱᓕᕆᐊᑦᓴᕗᑦ ᑐᕌᕐᓂᖃᖅᑐᑦ ᓄᓇᓕᓐᓂ ᐱᖃᑕᐅᑎᑦᓯᓂᕐᒥᑦ ᐊᒻᒪᓗ ᑮᓇᐅᔭᖃᖅᑎᑦᓯᓂᕐᒥᑦ, ᐃᓄᓐᓂᒃ ᐃᖅᑲᓇᐃᔭᖅᑎᑖᕋᓱᐊᕐᓂᕐᒥᑦ, ᐊᒻᒪᓗ ᐃᓕᓐᓂᐊᕈᑕᐅᒋᓕᓐᓂᒃ ᖃᐅᔨᓇᓱᐊᕐᓂᕐᒥᑦ. ᑐᕌᕐᓂᖃᓲᖑᔪᒍᑦ ᐃᑲᔪᕐᓂᖃᕈᒪᓪᓗᑕ ᐃᓅᓯᕐᒧᑦ ᐊᒻᒪᓗ ᑮᓇᐅᔾᔭᓴᓐᓂᕐᒧᑦ ᐱᕙᓪᓕᐊᓂᐅᔪᒥᒃ ᓄᓇᓕᐅᔪᓂᒃ ᐊᕕᑦᑐᖅᓯᒪᓂᐅᔪᒥᑦ ᐊᐅᓚᑦᓯᕕᒋᔭᑦᑎᓐᓂᒃ. ᐃᓅᖃᑎᖃᓲᖑᔪᒍᑦ ᓄᓇᕘᓕᒫᒥᑦ ᐱᖃᑕᐅᑦᓯᐊᓂᒃᑯᑦ ᓄᓇᓕᓐᓂᒃ ᖃᓄᐃᓕᐅᖅᑐᖃᖅᑎᓪᓗᒍ ᐊᒻᒪᓗ ᐊᑐᐃᓐᓇᐅᑎᑦᓯᓂᕐᒥᑦ ᑮᓇᐅᔭᕐᓂᒃ ᐊᒻᒪᓗ ᑐᓐᓂᖅᑯᓯᐊᖅᑎᑦᓯᓂᒃᑯᑦ ᓄᓇᓕᒻᒥ ᐊᒻᒪᓗ ᑮᓇᐅᔾᔭᕋᓱᐊᙱᑦᑐᓄᑦ ᑲᑐᔾᔨᖃᑎᒌᓄᑦ.
ᐊᖏᖅᓯᒪᓂᕗᑦ ᐊᕙᑎᒧᑦ
ᐊᖏᖅᓯᒪᔪᒍᑦ ᒥᑭᓪᓕᒋᐊᖅᑎᑦᓯᓂᕐᒥᑦ ᐊᒻᒪᓗ ᐊᑦᓱᓗᐊᕌᓗᒃ ᐊᑦᑐᐊᓂᐅᔪᓂᒃ ᓇᒻᒥᓂᕆᔭᑦᑕ ᐊᐅᓚᔾᔪᓯᖓᓄᑦ ᐊᕙᑎᒥᒃ ᐃᑉᐱᒍᓱᑦᓯᐊᕐᓂᒃᑯᑦ ᐊᕙᑎᒥᒃ ᐱᕈᖃᑎᒌᖑᔪᓂᒃ ᐊᒻᒪᓗ ᐊᔾᔨᒌᙱᑦᑐᓂᑦ ᓄᓇᒥᑦ. ᑕᐃᒪᐃᓕᐅᓲᖑᔪᒍᑦ ᐱᓕᕆᖃᑎᖃᕐᓂᕐᒥᑦ ᐱᔨᑦᓯᕋᖅᑕᑦᑎᓐᓂᒃ ᐊᒻᒪᓗ ᑲᑐᔾᔨᖃᑎᒋᔭᑦᑎᓐᓂᒃ ᓴᐳᔾᔨᓂᕐᒧᑦ ᓄᓇᒥᑦ ᓴᓂᖃᙱᓐᓂᖅᓴᐅᓂᒃᑯᑦ, ᓱᕈᐃᙱᓐᓂᖅᓴᐅᓂᒃᑯᑦ ᐊᒻᒪᓗ ᐆᒻᒪᖅᑯᑎᓂᒃ ᐊᑐᕆᐊᖃᙱᑦᑐᓂᒃ ᐊᑐᙱᓐᓂᕐᒥᑦ ᓄᑖᖑᓂᖅᓴᓂᒃ ᐊᑐᖃᑦᑕᕐᓂᒃᑯᑦ ᐊᒻᒪᓗ ᑲᔪᓰᓐᓇᖅᑐᒥᒃ ᐋᖅᑭᒋᐊᖅᓯᓂᒃᑯᑦ.
ᐊᖏᖅᓯᒪᓂᕗᑦ ᐊᑦᑕᕐᓇᖅᑕᐃᓕᒪᓂᕐᒧᑦ
ᑲᑐᔾᔨᖃᑎᒌᕗᑦ ᐅᑉᐱᕈᓱᑦᑐᖅ ᐋᓐᓂᐊᖃᖅᑕᐃᓕᒪᓂᖅ ᐊᒻᒪᓗ ᐊᑦᑕᕐᓇᖅᑕᐃᓕᒪᓂᖅ ᐱᒻᒪᕆᐅᓂᖏᓐᓂᒃ. ᐊᑑᑎᖃᑦᓯᐊᖅᑐᖅ ᐊᒻᒪᓗ ᐃᖏᕐᕋᑦᓯᐊᕐᓂᕐᒥᑦ ᐊᐅᓚᑦᓯᓂᕐᒥᑦ ᐋᓐᓂᐊᖃᖅᑕᐃᓕᒪᓂᕐᒧᑦ ᐊᒻᒪᓗ ᐊᑦᑕᕐᓇᖅᑕᐃᓕᒪᓂᕐᒧᑦ ᐱᓪᓗᐊᑕᕆᔭᕗᑦ ᓇᒻᒥᓂᕆᔭᑦᑎᓐᓄᑦ ᐊᒻᒪᓗ ᐱᓕᕆᐊᕆᑦᓯᐊᓲᕗᑦ ᐃᖅᑲᓇᐃᔭᖅᑎᖁᑎᑦᑎᓐᓄᑦ, ᐱᔨᑦᓯᕋᖅᑕᑦᑎᓐᓄᑦ ᐊᒻᒪᓗ ᑲᑐᔾᔨᖃᑎᒋᔭᑦᑎᓐᓄᑦ ᓱᓇᓕᒫᓂᑦ ᐱᓕᕆᔭᑦᑎᓐᓂᒃ. ᐃᖅᑲᓇᐃᔭᕐᕕᑦᑎᓐᓂ ᐱᓯᒪᑦᑎᒍᑦᑕ ᐃᑲᔪᖅᓱᓲᖅ ᐆᒪᑦᓯᐊᕆᑦᑐᓂᒃ ᐃᖅᑲᓇᐃᔭᖅᑎᓂᒃ ᐊᒻᒪᓗ ᐊᑑᑎᖃᑦᓯᐊᖅᑐᓂᒃ ᐊᐅᓚᑦᓯᓂᐅᔪᓂᒃ. ᐋᓐᓂᐊᖃᖅᑕᐃᓕᒪᓂᕐᒧᑦ ᐊᒻᒪᓗ ᐊᑦᑕᕐᓇᖅᑕᐃᓕᒪᓂᕐᒧᑦ ᐱᓕᕆᐊᑦᓴᕗᑦ ᑐᕌᒐᖃᖅᑐᑦ ᒪᓕᑦᓯᐊᓂᕐᒧᑐᐊᖑᖏᑦᑐᖅ ᑭᓯᐊᓂ ᐱᓕᕆᓂᒃᑯᑦ ᐊᒻᒪᓗ ᐃᓕᖅᑯᓯᖃᓂᕐᕐᒥᑦ ᓇᐅᒃᑯᓕᒫᖅ ᐊᐅᓚᑦᓯᓂᕆᔭᑦᑎᓐᓂᒃ ᐃᖅᑲᓇᐃᔭᖅᑎᖃᕈᒪᓪᓗᑕ “ᐃᓅᓯᖃᖅᑐᓂᒃ” ᐱᒻᒪᕆᐅᒋᔭᑦᑎᓐᓂᒃ. ᖃᐅᔨᓴᑦᓯᐊᓲᖑᔪᒍᑦ ᐋᓐᓂᐊᖃᖅᑕᐃᓕᒪᓂᕐᒥᑦ ᐊᒻᒪᓗ ᐊᑦᑕᕐᓇᖅᑕᐃᓕᒪᓂᕐᒥᑦ ᐅᓗᕆᐊᓇᕐᓂᐅᔪᓂᒃ ᓇᐅᒃᑯᓕᒫᖅ ᐊᐅᓚᑦᓯᓂᕆᔭᑦᑎᓐᓂᒃ. ᓴᖏᓂᖃᖅᑎᑦᓯᓲᖑᔪᒍᑦ ᐃᖅᑲᓇᐃᔭᖅᑎᖁᑎᑦᑎᓐᓂᒃ ᓇᓗᓇᐃᖅᓯᓂᒃᑯᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᐅᓗᕆᐊᓇᖅᑐᓂᒃ ᐊᒻᒪᓗ ᐊᑦᑕᕐᓇᖅᑐᓂᒃ. ᑕᐃᒪᐃᓕᐅᕐᓂᒃᑯᑦ ᐃᓕᖅᑯᓯᖃᖅᑎᑦᓯᕗᒍᑦ ᐊᑦᑕᕐᓇᖅᑕᐃᓕᒪᓂᕐᒥᑦ ᐅᔾᔨᕈᓱᓐᓂᕐᒥᑦ ᐊᒻᒪᓗ ᓵᑕᐅᒍᓐᓇᕐᓂᕐᒥᑦ.